कतारको दोहामा एक नेपालीको हत्या, पाँच जना घाइते

दूतावासका अनुसार घटनामा एकजना नेपालीको मृत्यु भएको छ भने अन्य ५ जना नेपाली घाइते भएका छन्। दूतावासले जारी गरेको विज्ञप्तिअनुार सुनसरीका तरबेज अन्सारीको घटनास्थलमै मृत्यु भएको थियो। घाइते मध्ये उमर अन्सारीको दोहाथित हमाद अस्पतालमा उपचार भइरहेको दूतावासले जानकारी दिएको छ ।

यस्तै इब्राहिम अन्सारी र नौसाद अन्सारी भने खतरामुक्त रहेका छन् । अन्य दुईजना घाइते अकबर मिया र महुद अन्सारीलाई दूतावासले प्रहरी हिरासतबाट मुक्त गराएको छ।

दूतावासले घटनाको जानकारीपछि प्रहरी र दूतावासका कर्मचारीले घटनास्थल र हमाद अस्पतालको अवलोकन गरेको जनाएको छ ।

दूतावासले यस सांघातिक आक्रमणबारे कतारी अधिकारीसँग छलफल गरेको जनाएको छ । मृतक अन्सारीको शव नेपाल फर्काउन पहल भइरहेको जनाएको छ। दूतावासले भिडभाड हुने स्थानहरुमा नजानसमेत आग्रह गरेको छ।